له‌ده‌روازه‌ی ناحیه‌ی سلێمان به‌گ ئاڵای كوردستان هه‌ڵكرا و ناحیه‌كه‌ش كۆنترۆڵكرایه‌وه‌

سایتیكركوك 140

دوای ئه‌وه‌ی دوێنێ هێزه‌كانی پێشمه‌رگه‌و فرۆكه‌ جه‌نگییه‌كانی عیراق به‌چڕی ناحیه‌ی سلێمان به‌گ یان بۆردومان كردو به‌هۆیه‌وه‌ چه‌ندین چه‌ته‌ی داعش كوژراو و برینداربوون كه‌ له‌نێوانیاندا ئه‌مێرێك و پسپۆڕێكی ئاماده‌كردن و چاندنی بۆمب هه‌بوو، هێزه‌كانی پێشمه‌رگه‌و سوپای عیراق چوونه‌ نێو ناحیه‌ی سلێمان به‌گه‌وه‌

له‌و رووه‌ سه‌رچاوه‌یه‌كی ئه‌منی پێی راگه‌یاندین هێزه‌كانی پێشمه‌رگه‌ و سوپای عیراق پێشڕه‌ویان كرد به‌ره‌و ناحیه‌ی سلێمان به‌گ وتوانیویانه‌ بچنه‌ نێو ناحیه‌كه‌وه‌.

وتیشی له‌ئێستادا له‌ ده‌روازه‌ی ناحیه‌ی سلێمان به‌گ ئاڵای كوردستان هه‌ڵكراوه‌ و پێشمه‌رگه‌ش به‌رده‌وام له‌ پێشڕه‌ویدایه‌ بۆ كۆنترۆڵكردنه‌وه‌ی سه‌رجه‌م ناوچه‌كانی ناحیه‌كه‌.

ئاماژه‌ی  بۆ ئه‌وه‌شكرد چه‌ته‌كانی داعش زۆربه‌ی ناوچه‌كانی ناحییه‌كه‌یان بۆمبڕێژكردووه‌ و له‌ ئێستادا ئه‌و بۆمبانه‌ ده‌ته‌قنه‌وه‌، به‌ڵام تا ئێستا زیانی بۆ هێزه‌كانی پێشمه‌رگه‌ نه‌بووه‌

ئه‌وه‌شی دووپاتكرده‌وه‌ كه‌ چه‌ته‌كانی داعش له‌به‌رامبه‌ر پێشڕه‌وییه‌كانی پیشمه‌رگه‌ خۆیان پێ راناگیرێت و به‌رده‌وام هه‌ڵدێن.